De Nieje Tied Weerldwied

Oet De Nieje Tied nummer 3 (februari 1995)
Gerrit Klaassen

Hacker

- Kortns mos der in Almeloa nen hacker biej n rechter vuur t hekke verschienn.
- Wat vertel iej miej noe?
- Kortns...
- Joa, dat he'k wal heurd. Mer wat mos Hekket biej de rechtbaank doon?
- Ik zear dat der nen hackerrr, met ne r van rrrowmoos, an-eklaagd wördn. Dát he'k ezegd.
- Den Hekker, wel is dat dan?
- Iej könt better vroagn: wát dat is in plaats van wél...
- Good, good. Ik begin wa wier van vuurtn of an. Wát is nen hekker?
- Hè, hè! Ha'j t ok zoo wied? t Hef wal dree kortn en dree langn mötn doern... Mer wiej zint woar a'w wean möt.
- Keerl-en-gen-ean, scheet noe mer op. Wél is... ik bedool... verteal miej noe s wát nen hekker is.
- Na good, mö'j luustern. Nen hacker is t niejste soort krimineel. t Is nen duvelstoojager van n digitaaln snelweg.
- Snelweg? Jaagn den dan zoo har?
- Den hacker har zölvns de wetnmakers joarn te glad of west.
- Mer aans noe nich; ze hebt m toch mer mooi vuur t hekke kregn. Nee, den hef völs te har jag en doo hebt ze m doarbiej trappeerd, wat ik oe kolveer.
- Joa dat za wa, aans hoovn e ok nich vuur n rechtbaank in Almeloa te verschienn. Mer t is nen krimineel van t niejste soort umdat e...
- Boo wisse, dat e van t niejste soort is, zal ok wa, aans ha'k der wal eerder van heurd.
- Weas noe s evn stil. Wi'j noe nog wetn wat hee biej de hakn hef had of nich?
- A'j t nich vuur oe könt hoaldn, ma'j t um miej geröst zegn, heur.
- Hoo he'k t noe! Wi'j nog wetn wat nen hacker is of nich? Dan kö'w better woaraans oaver kuiern...
- Nee, nee, t is a good. Gekheid... Goat mer verdan.
- Nen hacker is nen keerl, t kan aans ok wa n vrommes wean, den brek in biej...
- Joa, dat neumt wiej ínbrekkers en da's aans a n knap oald vak.
- Loat miej noe s oetproatn!
- ...
- ...den brek in biej nen kompjoeter van aandere leu. Den pleg hoesvreadebrök umdat e onwettig elektronies zit te gloepn in systeemn en programma's van wel aans.
- Met aandere weur: hoesvreadebrök via t stopkontak!
- Joa, joa. Krek zoo.
- Meer zunn achterbaksn, niejsgierigen kompjoeterkraker...
- Zoo zo'j t könn neumn, joa.
- Den geet vuur joarn achter t hek, dat doo k met oe.
- Dat zal zich nog mötn oetwiezn.
- (zachtkes) Mer, uh... oonder oons ezegd, is t nen könnigen?
- Dat zo'j wal könn zegn, joa...
- Dus iej wet wel t doan hef?
- Joa, dat we'k wa, dat doo k.
- Wel dan?
- Ik heb aans nich geern dat de leu zoln wetn da'j t van miej hebt.
- Wisse, wisse, doar kö'j van op an. Iej wet wel a'j vuur oe hebt.
- Mö'j miej beloavn da'j t nich wieder vertealt.
- Joa, joa. Kop der of!
- Noe mö'k oe zegn: ik heb t ok mer van verteln, dat he'k.
- Joa, joa. Na, wel is t?
- ...
- Na?
- ... (zachtkes fluusternd) Hekket!
- Tsss... ha'k t nich dach...
 

2007-07-06  Bits & Books, post goaitsen@home.nl