|
|
Zoaterdag den 19n meert 1994 was nen dag van betaansie veur t Tweantse plat. Hier, op dizze zölfde stee, V&D in Eanske, wördn DNT eprisnteerd en t eerste eksemplaar oaverlangn wiej an den eerstn betaalnden abonnee.
t Geet an! stön der op de veurbladziede met n oetroopteekn. En noe, een joar later, kö'w inderdoad wa zegn, da'w t mirakels an-egoan bint!
Krek wat wiej woln.
De Twentsche Courant hef good deurzeen wat oons drif woar Gerard Vaanholt oons beeldmaark beschrif: Het logo is treffend en vol symboliek. De titel De Nieje Tied rimpelend als het water na het werpen van de steen. De Nieje Tied wil iets in beroering brengen in de Twentse streektaalvijver.
Joa. Beweging, bereuring. Doar dreait t oons umme.
Alns wat leavt möt beweegn. Dat gealdt veur ne sproake eavnzoogood as veur net t zölfde wat veur organisme. En wat beweegn wil, möt doartoo de ruumte hebn. Ne sproake nemt zich dee ruumte, oet-enömn in den moondelingn umgaank, ok in t schriftelik verkeer.
Op dat gebeed ontbrök t an n meer of meender literair blad in t plat wat de longn har hangn noar de eigne tied. Doarvandan DNT.
Doo't wiej begönn nöagn wiej alman den op ne verniejnde, litereare en kritiese maneer met de gewestelike sproake um wol goan de penne op te kriegn. En dan, zoo schreef de redaktie, zö'w s kiekn wat t wördt.
Wiej zint noe n joar en dree nummers wieder. Wel könnigheid hef ekreegn an DNT zag dat de bladziedn evöld wördn met (veur t plat) verniejnd proza en poëzie van leu dee't nen naam hebt op te hoaldn in de Tweantse literatuur of schrievers woarin nog ne verwochting verdoekt lig in t platschrievn. Met beide groepn zint wiej wies, benaamd ok met de leste, want zoo wördt den kreenk van wel in t plat schrif wieder.
Oaverstapnd van t litereare waark in eerste liene noar t litereare waark in tweede liene, t schrievn oaver de sproake, de litereare waarkn en alns wat dat anbelangt, komt wiej biej de rubriek Kort eKuurd veur de besprekking, en de rubriek Leu, Potleu & Stumpkes.
Woar de metafoor van den steen en de viever ok past, hier wa wisse t meest. In disse rubriekn vaalt mangs wa s, dat möt eerlik ezeg wean, harde weurde. Nich umdat de redaktie van DNT der ne sport van maakn wil um aandern de vlöa of te vangn. Mer wa umdat in Tweante ne attitude is egreuid um alns wat in t plat eschreevn was too te jubeln zoonder ok mer n oognslag let te geavn op den inhoald. As t mer in t plat was dan was t wa good. Zoo leek t.
Met dee onzoalige traditie brekt De Nieje Tied. Zee döt dat met t volle benul en op basis van inhoaldelike argumeantn. Dan verhelligt de leu dee't t angeet zich mangs. Ze veult zich in den tuk edretn biej elk woord van kritiek, hoo oonderbouwd ok. Den Neersassiesn professor Entjes waarschouwn a dat disselariejn en polemiekn oaver t plat vake meer in ne emotionele as in ne zakelike sfeer verloopt. Toch goat wiej wieder op disn pad. Ne sproake in ontwikkeling hef t neudig as brood dat der mangs stekkels op-ezat wördt teegn wel t verdeent.
DNT is nich heilig. Ok de redaktie kan t biej n verkeerdn eand hebn. Veur wel oons s, be-argumenteerd, duftig de oorn wil wasken, de bokse wil opbeendn of den board der of doon, schoeft wiej nen stool an in Leu, Potleu & Stumpkes.
In t oetzeen zoch DNT ok noadrukkelik ansloeting biej wat der hier en noe leavt. In den umslag van Gerard van Dragt wördt dat a sito dudelik eavnzoogood as in de vörmgeaving van de adverteansie van de grote bedrievn dee't oons hebt esponsord, V&D, Arke en Grolsch. En nich in t leste deur de karaktervolle illustroaties dee't oons blad mochn siern.
Elk blad, hoo schier t der oetzöt, hoo kwaliteitsvol t is, wil eleazn wördn. Zoo is t ok met DNT. Ok doar geet t oons good. Met deur alle andach in de kraantn en aandere media wet de leazers t blad te woardeern. t Abonneebestaand greuit stöarig-an, t lös verkoopn geet good... Benaamd studeernde jonge leu wet oons blad te estemeern. Nen niejn groep platleazers is doarmet an-eboord.
Alns biejene. Noa n joar gangs te hebn ewes met De Nieje Tied, bewis al t gebeurde eer bestoansrecht. En meer nog: der zit honning in de bloomn.
2007-07-06 Bits & Books, post goaitsen@home.nl
|
|