De Nieje Tied Weerldwied

Oet De Nieje Tied nummer 5 (april 1996)

Redaktioneel niejs

Dit nummer van De Nieje Tied har vanzölf n paar moand eerder t lecht mötn zeen. Dat har ok wisse wa könd as n oetgeaver/heufdredakteur t leste halfjoar nich zoo gloepns drok har west met aandere zaakn, zooas t verbouwn en inrichtn van zien nieje kantoor an t Sander in Eanske, t oetgeavn van nieje beuk, t pubelseern op Internet en umdewiel ok nog t op daghuur goan biej nen grootn multinational. DNT is en blif joa lefebrieje en doarvan kö'j n kin nich an t daansn hoaldn.
Dat was trouwns ok de reedn at der gin biejzönder platmuzieknummer hef west en t an-eköndigde Gigengack-nummer nog aait in de penne zit. Wiej hopt at t doarmet toch nog s wat wördt en a'w de tied der too könt doon um DNT nummer 6 èn 7 dit joar nog te loatn verschienn.

Te beginn met dit nummer van DNT is de schriefwieze van n naam van de rubriek achterin luk an epast. Noeverdan is t Leu, Potleu & Stumpkes, met ne u dus, net as biej de vervogingn jong - jungskes en bot - butkes. De ö ontsteet biej kleenkerveraandering alleen in weurde met dee aandere o-klaank, zooas hok - hökskes en dop - döpkes.
Ok de schriefwieze van lange eandkleenkers -aa, -oo is an epast in dee gevaln at t veurnaamste akseant der nich op vaalt. Dus t is nich meer prozaa, honorariaa, fotoo en radioo, mer gewoon proza, honoraria, foto en radio (meervoald radio's). Aleens blif veureerst de schriefwieze van weurde as schaa, koo, too, zoo, kadoo, buroo en kafee, ok in saamnstellingn.

Oonder n neumer De Nieje Tied Weerldwied stoat wiej nog aaltied op t Internet (met stukke oet alle nummers), mer verdan hen biej Bits & Books in Eanske. t Nieje URL-adres is http://members.home.nl/goaitsen/dnt/index.htm. Doarachter kö'j nog völ meer veendn oaver beuke, oetgeavers, regionale zaakn en sproakn. Ok oonzn Schriefwiezer kö'j doar bekiekn.
Op goaitsen@home.nl bint wiej met n e-mailtjen te bereikn.

2007-07-06 Bits & Books, post goaitsen@home.nl