Um den tied dat dit niejs de weerld in kwam, kreeg de redaktie van DNT un artikel in de busse van Natasja Engelbertink. Juust joa, ne dochter van Hennie Engelbertink, den in 1975 tehope met aandere veurankeerls van de Tweantse sproake den Kreenk vuur de Twentse Sproak oprichtn. As striedorganisatie. Zeet, dat is noe de opbreangst van ziene konsekweante hoalding veur t plat. Hee heul aandern veur de wichter ok in t plat op te breangn en bleef doarbiej zölvn nich van wiedn stoan kiekn. In dee zin is ok zon artikel te beschouwn as 'eerste oogst'.
Tegeliek is t ok n mooi bescheed op Keerlsproat van Bennie Sieverink in Leu, Potleu & Stumpkes, woarin hee klaagn zoo weinig vrouwleu schreevn in t plat. Wat dat angeet hef dit nummer van DNT nog meer in. Least dat geestige duët van Herman Finkers en Joke Wanschers mer s, of den column van Monique Sleiderink.
Mer met keerlsproat op zich is ok niks mis. Vergangn joar hef der nen Oaveriesselsn schriefwedstried ewes. Proza en poëzie in t plat was evroagd. Der wadn dree prieswinners in de catagorie 'ervaren' schrievers dee't ere biejdreagn ok regelmoatig doot in DNT. Den eerstn pries biej t proza göng noar Gerrit Kraa, en biej de poëzie was den tweedn pries veur Theo Vossebeld. Doar goa wiej wa luk greuts op. Oonzn Frees-tukkersn doezndpoot Goaitsen van der Vliet stön ok wier met n nös veuran, t gat in de botter. Biejkömstig dat zienn deardn (anmodigings-)pries biej de poëzie was oet egeavn deur n Kreenk. 'Bien étonné de se trouver ensemble?' heurn ik der ene zegn? Bo, foi toch. t Is bloos zoo dat den KTS-veurstaand kwaliteit wet te estimeern. Mangs dan kö'j van wille wa van n stool valn.
Joa wisse t is n mooi ding dee anerkenning van oonze sproake in n officieel Handvest. Kortns sprök der nen professor in t Frees en in t plat in de Eerste Kamer um in t spier te komn veur de 'minderheidstalen'. Wat weend in de rugge is nooit vort. Da's woar. Mer dee heuiwaag möt wiej toch ech zölvn in veurn. Der is noe meer te doon as veurhen.
'Van de leu mö'w t hebn!' is t motto van Roetgerink in Eanter. Ik deank dat, met of zoonder oaverheidssteun, dat zekers ok veur t plat gealdt.