De Nieje Tied Weerldwied
Oet De Nieje Tied nummer 8 (meert 1999)
Redaktioneel bod
Zoo dan! Dree kortn en dree langn hef t doerd vuur at dit nommer van De Nieje Tied biej de vaste leazers op de mat is kömn. Um t gat der nich oonder hen te dreain: t oetkomn hef dit moal nen bestn zet op zich wochtn loatn. t Har wa korter doern köand. Aans ok wa länger.
Noe kö'w met alderhaande oetvlochtn ankomn, mer t is wa zoo dat t leazn, bescheed doon, redigeern en akwisiteern van wier n nommer van DNT meestparts vuur alle dree de redaktieleu t leste van n dag is. t Vergangn joar is dat iederbod duur drökte en aander gedoo lign blevn en is der niks van op n klos kömn. Wiej hebt der nog wa de tied too doan, ha'w hoast zeg.
Um al dat wochtn luk temeut te komn kriegt oonze betaalnde abonnees ne biejzeundere toobate: In nen anvaank, un heandig beukken met twee verhaaln van Gerrit Klaassen vuurofgoan duur beeldweark van Rembrandt Harmenszoon van Rijn.
Wieders: de op ziedn 213 en 241 ankönnigde biejdreage van Fred van de Ven (van Triooo) löt nog evn op zich wochtn en wördt niejs wier verzat. n Schrieverd hef t nog nich zoo wied. Wiej hoaldt den teks nog te goo. Want a'w tied van leavn hebt, dan kon t ok nog wa s wean dat op n good moal t neegnde nommer van dit gereageld onreagelmoatige tiedschrif biej oe in de busse glid.