De Nieje Tied Weerldwied
Oet De Nieje Tied nummer 8 (meert 1999)
Gerrit Klaassen
Oaver: Triooo, Zo dan!
Zoo dan! Doar zö'j ne hebn! De eerste cd van t Eansker/Hengeler muziekgezelschöpken Triooo. Ene woar wat biej zit. t Kaante tekstbeukken gef den anheurder nen goodn inkiek op n inhoald. Der is biej de produktie good noadach oaver teks, muziek, ofwesseling en t riegn. Met hölp van vakleu as Caspar Falke en Goaitsen van der Vliet is der n joar laank slötteld an de kleane schilderbeeldkes dee't vuurbiej tiejt: vief moal plat, vief moal Hollaands, wier vief moal plat, vief minuutn leugte, en nog is t dan nich ofloopn. Muziek dee oe biejblif. Biej t besprekn wi'k miej bloots bepoaln töt de dialektnommers, schoonwal de Hollaandstalige leedkes vuur t plat nich onderdoot.
Biej t losdoon met Bennie is met t gebroek van veer piepkes en ne böggelfleske voort den ambachtelikn eenvoald te heurn. Met t wesseln van nommer zoargt t varieerde instrumeantnweark van René Vrieler en Harm Braam en t stembereik van Fred van de Ven vuur ne klaankkluur dee iederbod an stearkte weent.
Da's sito te heurn in Oonze Iene, nen meer of meender autobiografiesn teks, woar at den broenn klaank van n baritonsax mangs vol duurhen koomp. In t Liepke zit n paar mooie tempowesselingn, benaamd tusken t rappe trekzakmuziek en t liezige 'Zoo dan?' woarmet de jongs kafeehoaldster Annie der wier n pulken bier met too loat zetn.
In Versierd is t niejs wier den saxofoon den ne prachtige ondermoat angef. Kö'j t meuier kriegn in nen zin as 'Ik wör zoo geern deur n wiefken oet hen etn nömn'?
Krek t tweede leed döt den Bookhoalder (teagn kolnboer) steark deankn an de 50/60-er joarn. Teargnd wördt e duur Van de Ven vuurdröagn. De haande jökt oe. Iej zoln um: 'Oe krieg ik nog wa!'
Met A'j a'j vangt de möage van Triooo de tweede 'platte' rieg van vief an met ne vlotte (booskool)blues, alverdan anjag duur de 'oral bass' van Braam.
In Doar gung e hen weent n zanger eerst an (Hengeler weend)krach at e zich hellig maakt. t Bint niejs wier de saxn dee t weark kompleet maakt.
t Traansformatietransportnommer Mien Volvo vlög met asbak, plasticbeker en nen oard remweg in rap tempo vuurbiej. t Geet bearg-of: van Volvo en Dafje noar ne snorfiets! A'j nich oetkiekt vleeg iej met de bocht oet en kö'j ophemmeln. Un leed dat t biej t kortgebeente good zal doon.
Op melodie van Jelly Roll Morton hef Van de Ven met Woarum den teks van Ed Werac umzet in n slauw luusterleed: zitn kiekn en ofwochtn is t woar t feilik um geet. De herhaalnde klaankn van klarinet en mandoline stearkt t gemood wieders an.
Met Hawaii hef Vrieler nen oard muziek van de aandere kaante van t grote götngat maakt. Ukelele, ocean drum en ne elektriese Hawaii-gitaar loat oe doar slich in leuvn. Mer a'j luustert noar den teks dan wö'j rap oet n dreum hölpn at der wel geet te bekn en te beern en schreeuwt van 'Hoaldt de klappe too!' Ineenn bi'w wier in t hoes an de kökntoafel. Emigreern, dat zo'j.
Vuur t 'ofloopn' brech Triooo nog nen oard eerbewies an Karel Schönfeld Wichers. Nen keerl den at doomoals oogn en oorn nich in tuk höal at e keak en lustern hoodöanig leu gungn op twee been. Ritmies en in nen aldermeuistn eenvoald kump oe hier wat an de oorn wat wisse nog s n moal ne choreografiese invulling verdeenn zol.
An t lestn wi'k oaver Fred van de Ven ziene sproak nog schrievn da'j hoast nich heurn könt dat t Tweanske plat ziene eerste taal nich is. Dat e zich doar zoo vuur broekt hef is prieznsweerd!
Al met al n schiefken en n beukken dee't länger met könt as n eenn dag. Schier vakweark dat grote anerkenning verdeent.