Ik zeg oe! De regering, zeg ik oe! De regering hef der schoold an dat wiej voort temet s n moal allenig in de kaark zit, zeg mer, of da'j mooi dom stoat te kiekn in de kökn met ne vlak stoet. Zoonder keze!
Ik zeg oe en doarum zeg ik, de regering met eer beleid, ha'k hoast zeg, met al dee riekssubsidies op t oopnbaar vervoer, zeg mer, komt der al meer stadsbusn, streekbusn, buurtbusn, spitsbusn en meer van den pröttel, alverdan. En doarmet, en dat kö'j oe wa begriepn, völ meer sjaffeurs dee't hier nich kunnig bint! Joa? Dat zeg ik! En dee leu könt oons nich verstoan! Ik zeg oe!
En wat doot ze, na? Zee knapt alle dage deur oonze stroatn hen en wier, en dat doot ze!
En wa'k oe zeg, zee könt t verschel nich heurn tusken, en dat mean ik ok zoo, nen katteliek en n katnliek. Zee'j, veur eer is dat aleens, zee'j, mer wiejleu heurt t verschel wa tusken t 'Jéhézus' van t kaarkvolk en t 'keflap, keflap, keflap' van ne katte tusken de dubbelde achterbeande van ne bus. Zee'j! Dat wo'k oe mer zegn.
En zoo koomp der al meender volk in de kaark en al meender katn um t hoes en al meer muze in de kökn en dee vret oe de keze op!
Na, wat zeg ik oe? En wat zeit de muze? 'Piep!' En dat verstoat ze wa! Gossamme, loat ze doar dan oaverhen veurn, aait verdan met dat genöal en gedram, wat mö'k der met, doar kaan'k miej wa zoo hellig oaver maakn, hè.
Joa, dee jongs hebt ok gin schoold. Mer de regering, zeg ik oe, de regering!
Annie, doot miej nog n pulken bier!